Anak Ko, Dahan-dahan (Ambahan)

Ang tulang ito ay binigyan ng ikalawang gantimpala mula sa Bienvenido N. Santos Creative Writing Center noong ika-10 ng Abril 2013.

Anak ko, dahan-dahan

Palayan ay pagmasdan

Doon sa kapatagan

Pagtubo ay tuluyan

Huminto’y ‘di paraan

Hihintayin anihan

Sa init ng araw man

O sa bagsak ng ulan

Anak ko, anak naman,

Bakit ka nagkaganyan?

Ina mo’y ‘yong pakinggan

‘yong munting kahirapan,

Galit o kahinaan,

Alisin sa daanan

Tanggalin sa isipan

Problema’y kalimutan

Kabataan ay minsan

Buhay mo’y ‘yong taniman

Huminto’y ‘di paraan

Hintayin ‘yong anihan

Harap kinabukasan

Anak ko, dahan-dahan

Ngayon, magpakailanman